Brjálaði púllarinn

Unglingaböll

Hagaskólastemningin rifjaðist upp fyrir mér þegar ég skrapp á nýnemaball í Víðistaðaskóla í gærkvöldi. Ekki það að ég hafi nokkuð verið mikilvirkur ballmaður á unglingsárunum, en það var gaman að sjá að unglingarnir skemmta sér í raun nákvæmlega eins og þeir gerðu þegar ég var á þessum aldri. Það sem maður kallaði píkupopp hér áður fyrr er ekkert síður vinsælt núna...í dag er það bara í formi Justin Timberlake. Það var sett lag á með honum þegar ég var á svæðinu og það ætlaði allt vitlaust að verða. Enn eitt lýsandi dæmi um að það skipti ekki endilega máli hversu góður tónlistarmaður maður er, heldur hvernig maður er markaðssettur.

Í gærkvöldi kíkti ég líka á rennsli hjá Hafnarfjarðarleikhúsinu, en þeir eru að frumsýna á fimmtudaginn kemur. Þetta leikrit er í meira lagi athyglisvert og það var gaman að sjá Ólafíu Hrönn á sviðinu...hef alltaf haldið dálítið upp á hana sem leikkonu. Vonandi mun þessi sýning ganga vel.

Nú skal tekið á

Jæja, nú ætla ég að reyna að henda einhverju inn með reglubundnari hætti en áður....helst á hverjum vikum morgni. Við eigum að vísu eftir að sjá til með hvort það eigi eftir að standast en maður reynir þetta allavega.

Skrítin aðstaða á Laugardalsvellinum

Í gærkvöld var ég á Laugardalsvellinum á leik FH og KR þar sem ég var að mynda leikinn fyrir VF. Afar skrítin aðstaða...mitt lið var að spila en ég þurfti að leggja áherslu á hitt liðið og í raun draga taum þess þegar ég skrifa um það. Í raun enn erfiðari aðstaða en þegar ég var að skrifa um KR fyrir DV því þar þurfti ég "bara" að vera hlutlaus. En í raun fengur KR-ingar ekkert meira en þeir áttu skilið þó að þeir hefðu komist í 2-0. Þau mörk komu í raun upp úr engu og þar af fengu þeir seinna markið algjörlega á silfurfati. FH-ingarnir voru hins vegar sterkir, gáfust aldrei upp og börðust allan leikinn.

Eftir leikinn fór ég með myndavélina í búningsklefa FH-inga þar sem var mikil stemning og þangað mætti svo Hafnarfjarðarmafían og spilaði og söng FH-lagið. Það var í meira lagi athyglisvert að sjá mann spila á kontrabassa í svona litlu rými með svona miklu af fólki en það var skemmtilegt og frábært fyrir FH að komast í bikarúrslit eftir að hafa dottið út í undanúrslitum síðustu þrjú árin.

Fjarðarkaup

Í gær tók ég einnig viðtal við Sigurberg Sveinsson forstjóra Fjarðarkaupa, en búðin átti 30 ára afmæli í sumar og ætlar að halda upp á það í næstu viku. Mér hefur alltaf fundið að Fjarðarkaup sé skýrt dæmi um hvernig eigi að reka fyrirtæki. Þeir byrjuðu í frekar litlu rými, fluttu síðan eftir nokkur ár og stækkuðu við sig, en hafa í raun ekkert stækkað síðan þó að nýir vöruflokkar hafi kannski verið teknir inn. Margir bissness-menn hefðu án efa freistast til þess að gleyma einhverja litla búð í von um að græða ennþá meiri pening en það hefur ekki verið gert hjá þeim. Þeir hafa margs konar sérstöðu, eru með vörur á ágætis verði og hafa hundtryggan viðskiptavinahóp. Svona á að reka verslun.

Það skemmtilega var líka að Sigurbergur sýndi mér lógo með stórmörkuðum sem voru reknir fyrir ca. 15 árum. Þarna voru um tíu nöfn en af þeim eru aðeins Fjarðarkaup og Hagkaup eftir núna. Það segir ýmislegt að Fjarðarkaup hafi lifað af allar þessar hremmingar á matvörumarkaði í 30 ár.

Þessi pistill var EKKI í boði Fjarðarkaupa :)

Bloggfall

Jæja, loksins að maður nær að stinga niður penna. En ég get reyndar kennt blogger um þetta að hluta til því að hann neitaði að hleypa mér inn í bloggið mitt þegar ég ætlaði að uppfæra fyrir nokkrum dögum. Þetta fer að verða dálítið pirrandi.

Það minnisstæðasta sem gerst hefur frá síðustu uppfærslu er í sportinu. Góður sigur Liverpool á Everton, Íslandsmeistaratitill hjá KR-ingum og frábær leikur íslenska landsliðsins gegn Þjóðverjum. Maður getur ekki annað en brosað út að eyrum þegar gengur svona vel á þessum sviðum.

Svo verður skrifað undir kaupsamninginn á nýju íbúðinni á föstudaginn. Jibbí!!!!

DV í greiðslustöðvun

Ég las það á Moggavefnum í morgun að útgáfufélag DV hefur fengið þriggja vikna greiðslustöðvun. Ég get ekki sagt að þetta komi mér á óvart því að blaðið hefur farið hríðversnandi síðustu mánuði. Umbúðirnar stækka og stækka og innihaldið minnkar og minnkar. Það var reyndar ekki við öðru að búast eftir allar þessa uppsagnir og brotthvarf Sigmundar Ernis, sem að mínu mati bætti blaðið verulega fyrst eftir að hann kom.

Mér finnst sorglegt sem gamall starfsmaður blaðsins að sjá hvað misvitrir stjórnendur geta gert við blað sem hafði alla möguleika á því að verða prýðisgott (og var í raun orðið það). Það sem er kaldhæðnislegt er að Fréttablaðið er í raun að ganga á sömu formúlunni og DV gekk á fyrir 2-3 árum með mjög góðum árangri (fyrir utan það að sportið í Fréttablaðinu en mun síðra en það var á DV). Fréttablaðið hefur unnið vel eftir þessari formúlu og fyrir utan sportið er blaðið orðið prýðisgott. En hjá DV þarf eitthvað verulega mikið að gerast til að það lifi...það er hrein hörmung að sjá blaðið núna.