Brjálaði púllarinn

Framhaldið

Starfið mitt var auglýst í Víkurfréttum á fimmtudaginn. Í kjölfarið hafa nokkrir talað við mig og spurt hvort ég sé að hætta.

Og svarið er að ég er að hætta, allavega ekki seinna en í vor. Ég tók þá ákvörðun á haustmánuðum að leita mér markvisst að einhverju öðru í vor og hef verið í því síðustu vikur með bærilegum árangri.

Ástæða þess að ég ákvað að leita annað hefur ekkert með starfið sem slíkt að gera. Það hefur verið gríðarlega skemmtilegt að vinna við þetta blað, maður hefur kynnst fullt af frábæru fólki og jafnframt kynnst þessum þremur bæjarfélögum - Hafnarfirði, Garðabæ og Álftanesi - á allt annan hátt en ég hefði annars gert. Starfið hefur því bæði verið skemmtilegt og lærdómsríkt.

Það stóð hins vegar aldrei til hjá mér að ílengjast þarna til langframa. Þetta var fyrsta fasta vinnan sem mér bauðst eftir að ég hætti störfum á DV haustið 2002 og ég ákvað að stökkva á hana. Mitt takmark var að festa þetta blað í sessi sem bæjarblað í þessum þremur sveitarfélögum og ég tel að það hafi tekist núna. Nú er það í verkahring arftaka míns að styrkja og efla blaðið enn frekar, sem og vefmiðilinn.

Hvað varðar framhaldið hjá mér ætti það endanlega að koma í ljós á næstunni en ég er þó nánast örugglega kominn með starf í sumar, sem greint verður frá hér þegar allt er orðið pottþétt. Svo verður bara séð til með framhaldið.

***

Ég vaknaði klukkan sjö í morgun - á laugardagsmorgni! Bara gat ekki sofnað aftur. Hvað er í gangi!!???

***

Já, og meðan ég man, það er ekkert barn komið ennþá. Gangsetning verður á fimmtudag ef ekkert hefur gerst þá.

Spurning?

Af hverju birtist aðsend grein í Fjarðarpóstinum á morgun sem birtist hjá mér um miðjan nóvember?

Það er nú ekki svona mikið efnishallæri í Hafnarfirði og Álftanesi!!

Bið

Það hefur verið mikil bloggleti í mér upp á síðkastið. Maður hefur hugsað nokkrum sinnum: "Maður ætti nú kannski að blogga um þetta," en svo bara einhvern veginn ekki nennt því. En nú er þetta að færast til betri vegar. Öllum bloggum um DV, Sjálfstæðisflokkinn í Garðabæ og þar fram eftir götunum verður því bara sleppt nema að ástæða sé til annars.

***

Enn er barnið ekki komið og það þrátt fyrir að Rósa hafi verið sett á fimmtudaginn var. Við áttum reyndar ekki von á öðru en að hún myndi ganga framyfir þannig að það er ekkert stress á okkur. Ég tek mánuð í fæðingarorlof eftor að barnið fæðist og það er ekki laust við að ég hlakki svolítið til þess að taka þetta frí með konu og barni.

***

Á meðan er hins vegar brjálað að gera í vinnunni eins og venjulega. Næturvinna á þriðjudagskvöldum eins og venjulega og lítill svefn í nótt. Ætli maður hafi þá vit á því að fara snemma að sofa í kvöld. Nahh, ekki frekar en venjulega.

***

Í vikunni var ég beðinn um að vera með erindi og taka þátt í pallborðsumræðum á fundi sem Ungir jafnaðarmenn í Hafnarfirði standa fyrir. Yfirskriftin er "Eru fjölmiðlar á réttri leið?". Ég verð að viðurkenna að ég var nokkuð upp með mér að ég skyldi vera beðinn um þetta. En auðvitað veltur þetta á tímasetningu barnsins. Vona samt að ég geti tekið þátt í þessu, ekki bara til að tala fyrir fjöldanum heldur er þetta umræðuefni afar áhugavert og víðtækt. En ef ég get það ekki verður það af gleðilegu tilefni :)