Brjálaði púllarinn

Sextugsafmæli

Gærdagurinn einkenndist fyrst og fremst af afmæli móður minnar, en hún hélt upp á sextugsafælið sitt í gær. Heljarinnar stórveisla og matur fyrir ég-veit-ekki-hvað marga. Það var dálítið stress hjá okkur þar sem gjöfin til hennar kom með farþegaflugi frá Akureyri í gær og við komum klukkutíma of seint í afmælið, en ég held að mér hafi verið fyrirgefið það eftir að ég flutti ræðuna. En mömmu er hér með óskað til hamingju með daginn.

Síminn

Það er ekki ennþá búið að flytja símann. Þetta svokallaða þjónustuver sagði í gær: "Þetta hlýtur að koma í dag eða á morgun." Aha, er þetta álíka satt og þegar okkur var sagt að þetta væri komið en var svo ekki komið? Trúi þessu þegar ég tek á því! Og hvað þarf ég svo að bíða lengi eftir ADSL-tengingunni?? Ömurlegt! Og alltaf er maður að heyra fleiri hörmungarsögur af þessu fyrirtæki. Skelfileg þróun. Ég vil fá Þórólf aftur í djobbið strax!

Bráðavaktin

Nú er miðvikudagskvöldunum reddað - Bráðavaktin er byrjuð aftur. Var mikið búinn að sakna þessara frábæru þátta. Verð samt að viðurkenna að mér brá nokkuð þegar Romano gekk í þyrluspaðann og missti handlegginn. Vonandi verður hann starfhæfur hjá honum aftur.

Kominn inn!

Jæja, þá er allt draslið komið inn og við búin að afhenda Holtsgötuna. Ég var að vísu við það að fá nett víðáttubrjálæði því plássið er töluvert meira en það sem maður átti að venjast (þó að Holtsgatan hafi verið stærri en Þrastarásinn þá var kjallarinn alltaf í útleigu og því aldrei notaður af okkur) auk þess sem er gríðarlega hátt til lofts. En ég mun örugglega venjast þessu. Það er líka frábært að koma inn í allt nýtt. Það er auðvitað ennþá mikið í kössum og næstu dagar fara í að koma sér fyrir.

Það kom þó smá óhapp fyrir í gær. Rósa fór þá í langþráð bað og eins og stundum gerist flæddi aðeins upp úr baðkerinu. Það sem við áttuðum okkur hins vegar ekki á var að kverkarnar í gólfinu voru ekkert kíttaðar þannig að við vorum allt í einu vör við að vatn væri komið undir parketið. Eftir að hafa haft samband við tryggingarfélagið, sem sagði okkur að við hefðum ekki heimilistryggingu í gildi þarna (enda nýflutt inn og ekki búin að færa trygginguna) hófust björgunaraðgerðir á parketinu með hárblásara þar sem reynt var að blása í götin. Þegar ég svo athugaði parketið í morgun virðist það hafa tekist ágætlega...í það minnsta þangað til annað kemur í ljós.

Hræðileg þjónusta Og Vodafone

Ég var með farsíma frá Tali frá fyrstu dögum fyrirtækisins og var ánægður þar. Þjónustan var góð, þar var talað við mann eins og maður væri fullorðinn og maður fékk alltaf á tilfinninguna að maður væri velkominn. Eftir að sameiningarnar við Íslandssíma áttu sér stað og fyrirtækið breytti sér í Og Vodafone (sem út af fyrir sig hefði átt að vera viðvörunarmerki miðað við hvaða lið Vodafone styrkir) hefur þjónustan hins vegar hríðversnað.

Við fengum okkur heimilissíma hjá Halló á sínum tíma sem Og Vodafone hefur tekið yfir. Við tilkynntum á föstudaginn fyrir viku að við værum að flytja á þennan stað og okkur var lofað því að síminn yrði fluttur á föstudaginn síðasta. Við ítrekuðum síðan beiðnina þá og var okkur þá sagt að síminn væri kominn. Þetta reyndist ekki rétt þegar við könnuðum málið á laugardaginn og þegar við hringdum aftur í Og Vodafone og málið var kannað kom í ljós að flutningurinn hafði ekki átt sér stað.

Okkur var lofað ADSL-tengingunni í dag en miðað við þessi vinnubrögð kemur hún sennilega ekki fyrr en í lok vikunnar. Þetta er hreint út sagt ömurleg þjónusta og ef símareikningurinn væri ekki svona lágur hjá þeim væri ég löngu búinn að skipta yfir í Landssímann aftur. Þeim hefði greinilega ekki veitt af því að halda einhverjum af þessum starfsmönnum sem þeir sögðu upp þegar sameiningin átti sér stað.