Brjálaði púllarinn

Fataskápurinn endurheimtur

Það urðu miklir fagnaðarfundir í gær þegar við gátum aftur farið að nota fataskápinn í herberginu okkar. En það er ennþá parketlaust í herberginu ásamt helmingnum af stofunni og hluta af eldhúsinu. Ég geri ráð fyrir að hægt verði að leggja parketið eftir helgi þannig að helgin fari að hluta í að tæma hillurnar í stofunni og taka þær sundur.

Þetta fer að verða dálítið þreytandi!!

Vikan...

...hefur að öðru leyti verið hefðbundin. Ég tók mig þó til og keypti mér jakkaföt, var reyndar búinn að fara í tvær búðir áður en ég endaði í útsölu hjá Dressman í Smáralind, þar sem ég keypti svört jakkaföt og skyrtu á rétt tæp 17 þúsund. Mjög góð kaup og loksins hefur maður eitthvað að fara í á öllum viðburðunum sem eru framundan (sem eru reyndar aðallega árshátíð Liverpool-klúbbsins og árshátíð Hafnarfjarðarbæjar).

Blaðið gekk bara sinn vanagang en trúlega er eitt athyglisverðasta verkefnið að taka viðtal við Iðnskólamenn og Flensborgarmenn í Gettu betur. Kom í ljós nokkuð ólíkt viðhorf til keppninnar hjá liðunum en keppni þessara liða á þriðjudaginn verður allavega fróðleg.

Svo er Reykjanesbrautardeilumálið komið upp alvarlega. Það verður skemmtilegt á bæjarstjórnarfundum á næstunni!

Helgin...

...var ofurróleg. Ekki einu sinni fótbolti, þar sem ég tognaði á ökklanum í tímanum á undan og er ennþá dálítið aumur í honum. Reikna þó með að ég verði orðinn góður í næsta tíma.

Horfði á Simpson og Idol á föstudaginn eins og við fjölskyldan gerum alltaf saman. Hef ekki mikið verið að lýsa mínum skoðunum á þessu hér en best að gera það núna...það var rétt ákvörðun tekin. Þó að Ardís hafi frábæra rödd vantar hana túlkunina. Ég sé hins vegar mikið eftir Tinnu Marínu úr þessari keppni, bæði vegna þess að miðað við frammistöðuna þá hefði Anna Katrín átt að fara og einnig af því að þegar Tinna söng lagið í seinna sinn var þetta miklu betra hjá henni. En ég held að það sé alveg ljóst að Kalli vinni þessa keppni, nema að hann klikki illa og Anna Katrín brilleri. Þó að Jón sé algjör sjarmör þá á hann ekki séns í þau tvö.

Laugardagurinn fór fyrst í að taka mynd af styrkhöfum afreksmannasjóðs Hafnarfjarðar, síðan var haldið á Players kl. 15 að horfa á Liverpool-Aston Villa, sem vannt nokkuð sannfærandi, og síðan aftur heim. Kvöldinu eytt í sjóvarpsgláp þó að sjónvarpið væri frekar leiðinlegt. Mér fannst Spaugstofuþátturinn á laugardag reyndar sá besti í margar vikur, en þessar heimsóknir Gísla Marteins á elliheimilið voru grátlega neyðarlegar og gamla fólkið virtist hálfpartinn ekki vita hvað það átti að gera. Mér leið eiginlega illa á meðan ég horfið á þetta, en einhverra hluta lét ég mig samt hafa það.

Í gær var svo íþróttamaður Garðabæjar, handbolti frá Hafnarfjarðarmótinu í 5. flokki og síðan kvennaleikur Hauka og Stjörnunnar myndaður.

Íbúðin í enn meiri rúst

Það var ekki nóg með að skipta þurfti um parketið. Í ljós kom að sökklarnir undir fataskápnum heima hjá mér eru ónýtir vegna vatnsskemmda. Þetta hefur valdið því að um helgina var mikill blásari í gangi í svefnherberginu til að ná rakanum burt, fötin okkar eru komin í ferðatöskur og fataskápurinn kominn á mitt gólf.

Mikið verð ég feginn þegar þetta verður allt saman búið.